அழகான பெண்கள் மட்டும்தான் ஜெயிக்கப் பிறந்தவங்களா

ஆங்கிலம், இந்தி, தெலுங்கு, மலையாளம், கன்னடம், கொரியன், தாய், சைனீஸ் என அத்தனை மொழிப் படங்களையும் தமிழில் மொழிமாற்றம் செய்து, கதை, வசனம் எழுதி, டப்பிங் பேசி, புது வடிவம் தருவதில் நம்பர் ஒன் ஜான்சி. திறமைசாலிகள் பிறப்பதில்லை, உருவாக்கப்படுகிறார்கள் என்பதற்கு ஜான்சி பொருத்தமான உதாரணம். கடந்து வந்த பாதையைத் திரும்பிப் பார்க்கிற ஒவ்வொரு கணமும், கண்ணீர் முட்டுகிறது ஜான்சிக்கு.

‘‘நான் உண்டு, என் கால் சென்டர் வேலை உண்டுன்னு இருந்தேன். ‘உன் குரல் ரொம்ப ஸ்வீட்டா இருக்கு. நீ ஏன் டப்பிங் பேசக்கூடாது’ன்னு நிறைய பேர் தூண்டி விட்டதுல, டப்பிங் ஆர்ட்டிஸ்ட் கார்டு எடுத்தேன். ஒரு படத்துல செகண்ட் ஹீரோயினுக்கு பேசப் போனேன். செலக்ட் ஆகலை. அடுத்து இன்னொரு படத்துல இங்கிலீஷ் பேசற பொண்ணு கேரக்டருக்கு... அதுலயும் செலக்ட் ஆகலை. இப்படியே பல நிராகரிப்புகள்...

குரல் நல்லா இருந்தும், நல்ல மொழிப்புலமை இருந்தும், என்னை செலக்ட் பண்ணாததுக்குக் காரணம் என்ன தெரியுமா? என்னோட தோற்றம்! நான் கருப்பா, குண்டா இருக்கிறதுதான் வாய்ப்புகளுக்குத் தடையாம்! எனக்கு இத்தனை மொழிகள் தெரியுங்கிறதோ, என் குரலோட தனித்தன்மையோ யார் கண்களுக்கும் தெரியலை. அவங்களைப் பொறுத்த வரை அழகா, ஸ்லிம்மா இருக்கிற ஒரு ஹீரோயினுக்கு டப்பிங் பேசணும்னா, டப்பிங் பேசறவங்களும், அதே மாதிரி அழகா, ஒல்லியா இருக்கணும்னு நினைக்கிறாங்க. அழகுங்கிற மாயை இந்தத் துறையில மட்டுமில்லீங்க... எல்லா இடங்கள்லயும் பிரதானத் திறமையா பார்க்கப்படுது. ‘அழகான பெண்கள் மட்டும்தான் ஜெயிக்கப் பிறந்தவங்களா’ன்னு எனக்குள்ள தாழ்வு மனப்பான்மை தலைதூக்குற போதெல்லாம், ‘நீ சாதிக்கப் பிறந்தவள். கட்டாயம் ஒருநாள் ஜெயிப்பே’ன்னு என் மனசாட்சி தைரியம் கொடுக்கும்.

‘இவ்ளோ நல்லா இங்கிலீஷ் பேசறீங்களே... பேசாம நீங்க டிரான்ஸ்லேஷனுக்கு முயற்சி பண்ணுங்களேன்’னு என்னைத் தேடி வந்த அட்வைஸ் எதையும் ஆரம்பத்துல நான்
சீரியஸா எடுத்துக்கலை.

இதுக்கிடையில காதல்... கல்யாணம்... குழந்தை உண்டானதும் வேலையை விட்டுட்டேன். 5 மாச கர்ப்பமா இருக்கிறப்ப, ஒரு பெரிய தீ விபத்து. உடம்பு முழுக்க வெந்து, உயிருக்குப் போராடற நிலைமைல ஆஸ்பத்திரில கிடந்தேன். வயித்துல குழந்தை வளர்ந்துட்டதால, அபார்ஷனும் பண்ண முடியாத நிலைமை. அதே வேளை குழந்தை நல்லபடியா பிறக்கணுமேங்கிற கவலை இன்னொரு பக்கம். கர்ப்ப காலம் முழுக்க பயத்துலயும் சோகத்துலயுமே கழிஞ்சது. ஆனா, கடவுள் என்னைக் கைவிடலை. நான் எதிர்பார்த்ததைவிட அழகா, ஆரோக்கியமான குழந்தையா பிறந்தான் நிரஞ்சன்.
குழந்தை பிறந்து,

ஃபயர் ஆக்சிடென்ட் அதிர்ச்சிலேருந்து ஓரளவு நான் வெளிய வந்ததும், மறுபடி மனசு டப்பிங் துறையைப் பத்தி யோசிச்சது. இந்த முறை ஒரு வெறியோட வாய்ப்புத் தேடி அலைய ஆரம்பிச்சேன்.
‘சுட்டி’ டி.வில ‘பம்பர் கிங்’னு ஒரு கார்ட்டூன் தொடரை டப்பிங் பண்ற வாய்ப்பு வந்தது. டப்பிங் ஸ்டூடியோல உபயோகிக்கிற நியாண்டோ சாஃப்ட்வேர் போட்டேன். பொதுவா டப்பிங் பண்றப்ப, எந்த மொழில இருக்கோ, அதை நமக்குத் தேவையான இன்னொரு மொழியில மாத்தி எழுதணும். அதுக்கு ஒரு எழுத்தாளரைத் தேடணும். அப்புறம் டப்பிங் பேசறவங்களைக் கூப்பிட்டு, பேச வைக்கணும். எனக்கு தமிழ், ஆங்கிலம், இந்தி, தெலுங்கு, மலையாளம், கன்னடம்னு பல மொழிகள் தெரியுங்கிறதால,  நானே ஸ்கிரிப்டை மாத்தி எழுதுவேன். அப்புறம் என் குரல்லயே எல்லா கேரக்டர்களுக்கும் பேசுவேன். பேசப் பேச அது அப்படியே கம்ப்யூட்டர்ல பதிவாயிடும். அப்புறம் அதை டப்பிங் ஆர்ட்டிஸ்ட்கிட்ட கொடுத்துப் பேச வைப்பேன்...’’- மூச்சு விடாமல் பேசுகிற ஜான்சி, கொரியன், சைனீஸ், தாய் என வெளிநாட்டுப் படங்களையும் டப்பிங் செய்திருக்கிறார்.

‘‘அந்த மொழிகள் எனக்குத் தெரியாது. காட்சிகளை வச்சுக் கதையைப் புரிஞ்சுக்குவேன். அதுக்கேத்தபடி வசனம் எழுதி, டப்பிங் பேச வச்சு, ரீ ரெக்கார்டிங், எடிட்டிங், மியூசிக் எல்லாம் முடிச்சுக் கொடுப்பேன்’’ என்பவர் இப்போது டிஸ்னி கார்ட்டூனுக்கான சில நிகழ்ச்சிகளை டப்பிங் செய்து கொண்டிருக்கிறார். தவிர ‘நிரஞ்சன் ஆடியோஸ்’ என்கிற பெயரில் சொந்தமாக டப்பிங் ஸ்டூடியோவும் நடத்துகிறார். இன்ஜினீயரிங், டப்பிங் கோ-ஆர்டினேஷன் என டப்பிங் தொடர்பான அத்தனை நுணுக்கங்களும் தெரிந்தவர்.

வாய்ப்புகளை மறுத்தவர்களே மறுபடி அழைத்து வாய்ப்புக் கொடுக்கும் அளவுக்கு ஜான்சியின் வளர்ச்சி இன்று உச்சம் தொட்டு விட்டது. ஆனாலும், ‘டப்பிங் பேசுவதில்லை’ என்பதே ஜான்சியின் இப்போதைய கொள்கை.

‘‘எனக்கு 29 வயசுதான் ஆகுது. அதுக்குள்ள 50 வயசுக்கான பக்குவம் எனக்கு வந்திருச்சு. வாப்புக்காக ஏங்கினப்ப கிடைக்கலை. இப்ப வாய்ப்புகள் தேடி வரும்போது அதை ஏத்துக்கிற மனநிலை எனக்கில்லை. டப்பிங்ல அடுத்தடுத்த கட்ட வளர்ச்சிக்குப் போயிட்டேன். வாய்ப்பு கொடுக்கிறவங்களுக்கு ஒரே ஒரு வேண்டுகோள்... ‘உங்க பின்னணி என்ன? அனுபவம் என்ன’ன்னு கேட்காதீங்க. முதல் வாய்ப்பே மறுக்கப்பட்டா, அவங்களுக்கு அனுபவம் எங்கேயிருந்து வரும்?’’ - நியாயமாகக் கேட்கிற ஜான்சி, இத்துறையில் புதிதாகக் கால் பதிக்க விரும்புவோருக்கு சில ஆலோசனைகளையும் சொல்கிறார்.

‘‘வித்தியாசமான குரல் வளமும், அதை ஸ்டைலா பேசற திறமையும், ரெண்டு, மூணு மொழிப் புலமையும் இருக்கிறவங்களுக்கு கை நிறைய சம்பாதிக்க டப்பிங் துறை சரியான சாய்ஸ். அதே நேரம் முதல் நாளே வாய்ப்புகள் குவிஞ்சு, வருமானம் கொட்டாது. நிறைய அவமானங்களை சந்திக்க நேரலாம். அதுக்கெல்லாம் யோசிச்சா, அடுத்த படில ஏறவே முடியாது. ஜெயிக்கணுங்கிற வெறி இருந்தா, வெற்றி நிச்சயம். அதுக்கு நானே உதாரணம்!’’நம்பிக்கை மனுஷியின் வார்த்தைகளில் வலிகளைக் கடந்த வெற்றிக் களிப்பு!

Read More

முயற்சி செய்யுங்கள் தொழில் முனைவர்களாகளாம்

நான் சில மாதங்களுக்கு முன்பு, ‘நாளை நமதா?’ என்ற தலைப்பில் சமுதாய மக்களை வெறும் வியாபாரிகளாக அல்லாமல் தொழில் முனைவர்களாகுங்கள் என்று எழுதியிருந்தேன். அந்தக் கட்டுரையினைப் படித்து விட்டு கனடா நாட்டு தலைநகர் டொரண்டோவில் வாழும் சகோதரர் ஹ_சைன் அவர்கள் என்னிடம் தொலைபேசியில் தொடர்பு கொண்டு தான் மலேசியா, சிங்கப்பூர், துபை, கனடா போன்ற நாடுகளில் பெரும்பாலான வாழ்க்கையினை அடுத்தவர்களுக்கு வேலை பார்த்து தொழிலாளியாக இருந்து விட்டேன், தனக்கு வயது 45 ஆகிறது, இனிமேல் இருக்கிற சேமிப்பினை வைத்து ஏதாவது ஒரு தொழில் தமிழத்தில் உள்ள அவருடைய சொந்த ஊரிலோ அல்லது பக்கத்திலுள்ள பெரிய நகரிலோ ஆரம்பிக்கலாம் என்று நினைப்பதாகவும் ஒரு ஆலோசனை சொல்லுங்கள் என்றார். அவருக்கு சில ஆலோசனை வழங்கினேன். அவருடைய உணர்வினைப் பாராட்ட வேண்டும். காலம் முழுவதும் கசக்கி பிழியப்பட்டு, கைகட்டி நிற்கும் வேலைக்காரனாக இருப்பதினை விட்டு விட்டு கம்பீரமாக தொழில் முனைவராக ஆகவேண்டும் என்ற முயற்சிக்காக. இது போன்று எண்ணற்ற சகோதரர்கள், சகோதரிகள் வாழ வழி தெரியாது திக்குத்தெரியாத காட்டில் வாழ்வதினைப் போன்றுள்ளனர். அவர்களை நீங்களும் தொழில் முனைவர்களாக்கலாம் என்பதினை வழியுறுத்தவே இந்த கட்டுரையினை உங்களிடம் சமர்ப்பிக்கிறேன்.
      தொழில் தொடங்க வேண்டுமென்றவுடனே முதலில் ஞாபகத்திற்கு வருவது பணம் எப்படிப் புரட்டுவது என்பது தான். ஆனால் என்ன தொழில் ஆரம்பிக்கலாம் என்று யோசனை செய்து அதன் பின்ப பணத்தினைத் தேடுவதில்லை பலர். தேவைகள் ஏற்படும் போது  தொழில் ஆரம்பித்தால் வெற்றி பெறலாம். அந்தத்தேவைக்கேற்ப தொழில் கண்டுபிடிப்பு பற்றி சிறிய உண்மை சம்பவத்தினைச் சொல்லி உங்களுக்கு விளக்கலாம் என ஆசைப்படுகிறேன். சென்னையில் சிறந்த பள்ளி ஒன்றில் 12ம் வகுப்பு படிக்கும் விஷ்னு என்ற சிறுவன்  விடுமுறைக்கு தன் பாட்டி ஊரான காரைக்குடிக்குச் சென்றான். ஆனால் எந்த விடுமுறையினை இனினையாகக் கழிக்கலாமென்று வந்தானோ அந்த குதுகூலம் காரைக்குடி வந்ததும் மறைந்தது. ஏன்? அங்கு சென்னையிலில்லாத அடிக்கடி மின் வெட்டு இருந்தது. அங்குள்ள அனைவரும் அவதிப்படுவதினை அறிந்தான். உடனே அவன் வாலாதிருக்கவில்லை. தான் தங்கியிருந்த அறைக்கு சுய கண்டுபிடிப்பில் மின் உற்பத்தி செய்து மின் விளக்கும் விசிறியும் ஓடும்படி செய்தான். எப்படி? தன் பாட்டி வீட்டிலிருந்த பசுமாட்டிலிருந்து 2கிராம் சாணத்தினை எடுத்து 2 மில்லி தண்ணீர் ஊற்றி கலக்கி அதில் 5செ.மீட்டர் நீளம் 4செ.மீட்டர் அகலம் உள்ள எலக்ட்ரிக் வயரை விட்டு ஒரு லைட் எரியும் அளவிற்கு மின் உற்பத்தி செய்தான். அதற்கான செலவு வெறும் ரூபாய் 125 தான். பின்பு கலவையினைக் கூட்டி மின் விசிறி ஓடச் செய்தான். அவனுடைய கண்டு பிடிப்பிற்காக ‘ஐ. ஸ்வீப’; என்ற எரிசக்தி, பொறியியல் ஒலிம்பிக்கில் அவன் அமெரிக்கா டெக்ஸாசில் நடந்த பொருட்காட்சியில் கவுரவிக்கப்பட்டான். வல்லவனுக்குப் புல்லும் ஆயுதம் என்று இதிலிருந்து விளங்குகிறதா?
      மேற்கூறிய உண்மைச் சம்பவத்தினை நான் உங்களுக்குச் சொல்லக் காரணம் நமதூர்களிலும் மின்வெட்டு இருக்கத்தான் செய்கிறது. அதற்காக அரசினையும் அதன் அதிகாரிகளையும் சாடிக்கொண்டு வாழா வெட்டியாக உட்கார்ந்து விசிறியால் அல்லது காலண்டர் அட்டையால் வீசிக்கொண்டு இருப்போம். ஆனால் அந்தச் சிறுவன் அந்தத் தேவைக்கு என்ன வழி என்று ஒரு மாற்று சக்தியினைக் கண்டுபிடித்துள்ளான். அவன் கண்டு பிடிப்பு இரண்டு கோடி மாடுகள் உள்ள இந்தியாவில் வருங்காலத்தில் மின் உற்பத்தி மாற்றுத்தொழில் ஏற்படுத்துவதிற்கும் வழியாகுமல்லவா? ஆகவே நமது சிறிய சேமிப்பினை வைத்து தேவையறிந்து தொழில் செய்ய ஏராளமான வாய்ப்புகள் உள்ளன. அதனை பயன்படுத்த நாம் தவறக்கூடாது. மத்திய அரசும் மாநில அரசும் போட்டிப்போட்டுக்கொண்டு தொழில் முனைவோருக்கு மானியம் வழங்குகிறது.
      மானியம் வழங்கப்படும் தொழில்கள்:
மின் மற்றும் மின்னணு பொருட்கள் உற்பத்தி
தோல் சம்பந்தமான பொருட்கள் தயாரிப்பு
வுhகன உதிரிப்பாகங்கள் தயாரிப்பு
மருந்துப் பொருட்கள் உற்பத்தி
சூரியசக்தி உபகரணங்கள் உற்பத்தி
ஏற்றுமதி ஆபரணங்கள்
மாசுகட்டுப்பாடு உபகரணங்கள்
விளையாட்டுப் பொருட்கள்
சிக்கன கட்டுமானப் பொருட்கள்
ஆயத்த ஆடைகள் தயாரிப்பு போன்றவைகள்
அரசு வழங்கும் சலுகைகள்:
15 சதவீதம் மானியமாக வழங்கப்படுகிறது.
36 மாதங்களுக்கு 20 சதவீதம் குறைந்த மின் அழுத்த மின்சாரம் வழங்கப்படுகிறது.
சிறிய தொழில்களுக்கு உற்பத்தித் தொடங்கி முதல் ஆறு ஆண்டுகளில் தெலுத்தப்படும் மதிப்புக்கூட்டு வரிக்கு((வாட்) ஈடான தொகை மானியமாக மாவட்ட தொழில் மையம் மூலம் வழங்கப்படுகிறது.
உற்பத்தித் தொடங்கிய மூன்று ஆண்டுகளிலிருந்து ஐந்து ஆண்டுகள் வரை குறைந்த பட்ச 25 வேலையாட்களை பணியில் ஈடுபடுத்தவும் நிறுவனங்களுக்கு கூடுதலாக ஐந்து சதவீதம் அதிகபட்சமாக ரூபாய் ஐந்து லட்சம் வரை வேலை வாய்ப்பினைப் பெருக்க மானியம் வழங்கப்படுகிறது.
ஒவ்வொரு மாவட்டத்திலும் தொழில் தொடங்கி சலுகைகள் பெற பின்தங்கிய வட்டங்கள் என அறிவிக்கப்பட்டுள்ளன. 1971 ஆம் ஆண்டு சிப்காட் என்ற சிறு தொழில் மையம் அரம்பிக்கப்பட்டு இதுவரை 12 மாவட்டங்களில் 19 தொழில் மையங்கள் நிறுவப்பட்டு 1803 தொழில் நிறுவனங்களுக்கு ஒதுக்கீடு செய்யப்பட்டுள்ளன. அவைகள் எவை        என மாவட்ட தொழில் மையங்கள் மூலம் அறிந்து தொழில் தொடங்கலாம்.
      தொழில் தொடங்க அரசு வங்கிகள் தாராளமாக கடனுதவி செய்கின்றன. அதனைப் பொறுவது எப்படி? வெறும் கையினை வைத்து முழம் போட முடியுமா என சிலர் கேட்பதுண்டு.
தொழில் தொடங்கி கோடீஸ்வரர்களான சென்னையிலிருக்கும் வி.ஜி.பி, எம்.ஜி.எம், சரவண பவன் உரினையாளர்கள் திருநெல்வேலி, தூத்துக்குடி மாவட்டங்களிலிருந்து வெறுங்கையுடன் வந்து ஹோட்டலில் வேலை பார்த்து இன்று பெரிய பணக்காரர்கள் ஆகியிருக்கிறார்கள் என்றால் ஆச்சரியமாகவில்லையா? ஏன் அவர்களைப் போல உங்களால் வெறும் கையினை வைத்துக் கர்ணம் போட்டு சாதிக்க முடியாதா? முடியும். உங்கள் கையில் உள்ள சேமிப்பினை வைத்து தொழில் தொடங்க வங்கிகளின் மானேஜரை அனுகி உங்கள் தொழில் தொடங்கும் திட்டம் பற்றி எடுத்துச் சொல்லுங்கள். உங்கள் மனுவில் நீங்கள் செய்யப்போகம் தொழில், மொத்த முதலீடு எவ்வளவு, யார்-யார் பங்குதாரர், ஒவ்வொருவருக்கும் எவ்வளவு முதலீடு, செய்யப்போகும் தொழிலின் மார்க்கெட் நிலவரம், வருமானம் எப்படி, வங்கிக்கடனை எந்த வழியில் திருப்பிச் செலுத்துவது, கடனைத் திருப்பிச் செலுத்த வேண்டிய உத்திரவாதம்(சூரிட்டி) போன்ற விபரங்களை மனுவுடன் இணைக்க வேணடும். அதனை வங்கி அதிகாரிகள் ஆய்வு செய்வார்கள். அதன் பின்பு வங்கிக்கடன் மூன்று வருடத்திலிருந்து பத்து வருடத்திற்குள் செலுத்தினால் 13 சதவீதத்திலிருந்து 16 சதவீதம் வட்டியுடன் அசல் தொகையும் வசூலிக்கப்படும். கடன் தொகையினை ஒழுங்காக செலுத்தினால் கூடுதலாக கடன் பெறலாம். தொழில் தொடங்கி உற்பத்தி செய்யம் போது அந்த உற்பத்திப் பொருட்களை ஈடாக வைத்து கடன் பெறலாம். தொழிற்சாலை, கட்டிடம், எந்திரம், கச்சாப்பொருட்கள் என்று தனித்தனியாக கடன் பெறலாம். சிலர் கடன் வாங்கினால் வட்டி கட்டவேண்டும் அது இஸ்லாத்திற்கு எதிரானது என்று சொல்லலாம். அரசு வங்கிகளால் வழங்கப்படும் பணம் மக்களாகிய உங்களுடையது. அந்தப்பணத்தினை பணமதிப்பீடுக்கிணங்க கடனை கூடுதலாக செலுத்துகிறீர்கள். (உதாரணத்திற்கு சென்னை மண்ணடியில் ஒரு கிரவுண்ட் நிலத்தினை இந்த ஆண்டு  ஒருவர் ரூபாய் 80 லட்சத்திற்கு வாங்குகிறார் அந்த இடம் மூன்று ஆண்டுகளுக்குப் பிறகு அப்போதைய மதிப்பீடுக்கிணங்க ரூபாய் ஒருகோடியே இருபது லட்சத்திற்கு விற்பதில்லையா? அது லாப நோக்கத்திற்காக விற்பதுதானே! ஆகவே நீங்கள் குற்ற உணர்வுடன் அரசு வங்கிளிடமோ அரசு நிறுவனங்களிடமோ கடனைப் பெறுவதினை நோக்க வேண்டாம். அது உங்கள் பணம் என்று உரினையுடன் நினைக்க வேண்டும்.
      இரண்டு வாரத்திற்கு முன்பு வெள்ளியன்று சென்னை மண்ணடி செம்புதாஸ் தெருவிலுள்ள பள்ளிவாசலுக்கு தொழுக சென்றிருந்தேன். தொழுகை முடிந்து வரும்போது 35 வயது மிக்க திடகார்த்தமான ஒரு பெண் ‘நாலணா எட்டணா’ கொடுங்கள் என்று பிச்சை கேட்டுக் கொண்டிருந்தார் அவருடன் நடுத்தர பெண்களும் இருந்தார்கள். ஏன் இந்த நிலை என்று சமுதாய அமைப்பு சகோதரர்கள் சிந்திக்க வேண்டாமா? ‘டாஃபே’ என்ற டிராக்டர் நிறுவனம் நடத்தும் சிவசைலம் மகள் மல்லிகா சீனிவாசன் ஆயிரம் கோடி தொழில் அதிபதி என்று இருக்கும் போது நாம் ஏழை எளிய முஸ்லிம் பெண்களுக்கு அரசு ஏற்படுத்தியிருக்கும் சுய வேலை திட்டத்திலாவது அவர்களுக்கு தொழில் தொடங்க ஏற்பாடு செய்யலாமே என்ற ஆதங்கம் எனக்கு இருக்கத்தானே செய்யும்! இந்திய தாராள பொருளாதார கொள்கைக்கு பின்பு இந்திய பொருளாதார வளர்ச்சி எப்படியுள்ளது என்று அறிய பொருளாதார நிபுணர் டெண்டுல்கர்(கிரிக்;கட் வீரர் அல்ல) தலைமையில் ஒரு கமிட்டி அமைக்கப்பட்டது. அந்த கமிட்டி கொடுத்த அறிக்கை பெரும் அதிர்ச்சியாக இருந்தது. அது என்ன? வறுமைக்கோட்டிற்கு கீழ்வாழும் மக்கள் தொகை 25 சதவீதத்திலிருந்து 2009ல் 37.2 சதவீதமாக அதிகரித்து விட்டது என்பது தான் அது. ஆகவே வறுமைக் கோட்டின் கீழ் துவண்டு கொண்டுள்ள பெண்களுக்கு சுய வேலை திட்டத்தில் தொழில் துவங்க வழி வகை செய்யலமே!.
சுயவேலை தொழில் எப்படி தொடங்குவது?
ஒரு கிராமத்தில் வசிக்கும் 12 முதல் 20 ஏழை பெண்கள் உறுப்பினர்களாக சேர்ந்து ஒருவருக்கொருவர் உதவி செய்யும் மனப்பான்மையுடன் உருவாக்கப்பட்டதே சுயவேலைக் குழு.  வருமானம், கல்வியறிவு, வேலையின்மை, சொத்து அடிப்படையில் வறுமைக்கோட்டிற்குக் கீழுள்ள 21 வயது முதல் 60வயது வரை பெண்கள் சுய உதவிக்குழு தொடங்கலாம். அப்படி தொடங்கப்பட்ட குழு அங்கீகரிக்கப்பட்ட தொண்டு நிறுவனத்தில்(என்.ஜி.ஓ) மூலம் மாவட்ட மகளிர் திட்டத்தில் இணையலாம். அந்தக் குழுவில் கல்வியறிவு பெற்ற ஒருவர் செயல் இயக்குனராகவும், விபரம் தெரிந்தவர் இயக்குனராகவும், மற்றும் இரண்டு பிரதிநிதிகள் கொண்ட செயற்குழுவினை ஏற்படுத்திக் கொள்ளலாம். அந்தக் குழு ஆரம்பித்து இரண்டு அல்லது மூன்று மாதங்களில் சங்க சேமிப்பில் உறுப்பினர்களுக்கு அவசர மருந்துச் செலவு, கல்விச் செலவு, தொழில் தொடங்க மூலதனம் குறைந்த காலத்தில் திருப்பிச் செலுத்தும் வகையில் ரூ500 லிருந்து கடன் வழங்கலாம். சிறப்பாக செயல்படும் குழுக்கழுக்கு வங்கிகளில் ரூபாய் ஐந்து லட்சம் வரை 12 சதவீத வட்டியில் கடன் பெறலாம். அரசுக் கடனில் ரூபாய் ஐந்து லட்சத்திற்கு ரூபாய் 1,75,00 மானியமாகப் பெறலாம். ஆர்ப்பாட்டம், பொதுக்கூட்டம், பேரணிக்கு முஸ்லிம் பெண்களை அழைத்துச் செல்லும் சமுதாய இயக்கங்கள் ஏழைப் பெண்கள் கவுரவமாக வாழ மேற்கூறிய சுயவேலை தொழில் மையங்களை அவர்களுக்கு ஏற்படுத்தலாமே!
ஓருங்கினைப்பு:
      முன்பெல்லாம் தொழில் தொடங்க ஒவ்வொரு அலுவலமாக அலைந்து அனுமதி வாங்க வேண்டியதிருந்தது. அதனை ஒருங்கிணைத்து ஒரே இடத்தில் வழங்கச் செய்து எளிதாக்கியுள்ளார்கள். கீழ்கண்ட மையத்தில் மனு செய்தாலே உங்களுக்குத் தேவையான அனுமதி கிடைக்கும்:
செயல் துறைத் தலைவர்(வழிகாட்டுதல் குழு),
தமிழ்நாடு தொழில் வழிகாட்டுதல் மற்றும் ஏற்றுமதி மேம்பாட்டுக்குழு,
19ஏ, ருக்மணி லட்சுமிபதி சாலை, எழும்பூர்,
சென்னை-600001
தொலைபேசி: 044-28553118, 285553866
  ஃபேக்ஸ்: 28588364
தொழில் நுணுக்கங்கள்:
தொழில் தொடங்கிய உடனே வெற்றியடைய முடியாது. திட்டமிட்டு சரியான இயக்கத்தில் தொடங்கினால் வெற்றி பெற முடியும். நமது வாடிக்கையாளர்களை நம்முடைய அனுகுமுறை வைத்தே தக்க வைக்க முடியும் என்பதிற்கு ஒரு உதாரணத்தினைச் சொல்லலாம் என நினைக்கிறேன். சென்னை ராதாக்கிருஷ்ண சாலையிலுள்ள ‘நீல்கிரிஸ் டிப்பார்ட்மெண்ட்’; ஸ்டோரில் நாங்கள் மாதாந்தர மளிகை சாமான்கள் 1991 ஆம் ஆண்டு முதல் வாங்குவது; வழக்கம். முதலில் ஒரு வயதானவர் அவரின் மூத்த மகன் கவனித்து வந்தார்கள். வாடிக்கையாளர்கள் மீது கவனம் வைத்து தொழில் செய்து வந்தார்கள். ஐந்து ஆண்டுகளுக்கு முன்பு அந்தப்பெரியவரின் இளைய மகன் மேற்பார்வையிட்டார். அவர் எம்.பி.ஏ படித்தவர் என்று கேள்விப் பட்டேன். வழக்கம் போல் வாங்கும் மளிகை சாமான்களுடன் வெண்டைக்காய் வற்றல் பாக்கட்டில் அடைத்ததினை வாங்கினேன். வீட்டில் வந்து தேவைக்கு பிரித்தபோது அது பூசனம் அடைந்திருந்தது. உடனே அதனை எடுத்துச் சென்று அந்த இளைஞரிடம் காட்டினேன், அவர் மாற்று வெண்டைக்காய் வற்றல் தரமறுத்து விவாதம் செய்தார். நானும் அதனை பெரிது படுத்தவில்லை. ஆனால் அந்த இளைஞர் வந்து மூன்று மாதத்திற்குள் வுhடிக்கையாளர்கள் கூட்டிம் கழுதை தேய்ந்து கட்டெறும்பானது. சிறப்பாக இயங்கிக் கொண்டிருந்த நிறுவனத்தினை அவர் அணுகு முறை மூலம் கொடுத்துவிட்டார். அதன் பின்பு வேறு நிர்வாகத்தினர் இப்போது நடத்துகின்றனர்.
உங்கள் தொழில் நிறுவன உற்பத்திப் பொருள்கள் போட்டி நிறுவனங்களை விட தரமானது என்று மற்றவர்களுக்கு புரிய வைக்க வேண்டும். மற்றவர்களை கவரும் அனுகுமுறைக்கு தொழில் அதிபரும் வாழும் சீதக்காதியுமான பி.எஸ். அப்துர் ரஹ்மானுடைய உதாரணத்தினைக் கூறலாம். 2007 ஆம் ஆண்டு பி.எஸ்.ஏ பற்றி சிலம்பொலி சு. செல்லப்பன் எழுதிய சரிதை வண்டலூர் இன்ஜினீரியங் கல்லூரியில் நடந்தது. அதில் பி.எஸ்.ஏ உறவினர் சுயம் ஆலிம்சா அவர்கள் பி.எஸ்.ஏ வாடிக்கையாளர்களை கவரும் குணத்தினைச் சொன்னார். பி.எஸ்.ஏயும் சுயம் ஆலிம்சாவும் உறவினர்கள். இருவரும் வியட்நாம் தலைநகர் செய்கோன் நகரில் ஒருவரிடம் வைரம் இருப்பதாக 1960ஆம் ஆண்டுக்கு முன்பு சென்றார்கள். அவர்களுக்கு வியட்நாம் நாட்டு மொழி தெரியாது. அந்த வியாபாரியினை இருவரும் சந்தித்து வைரங்களின் விலையினைக் கேட்டார்களாம். வியட்நாம்காரர் விலை ரூபாய் ஏழு லட்சம் என்றாராம். ஆனால் இவர்கள் கொண்டு சென்றது வெறும் ரூபாய் மூன்று லட்சமாம். பேரம் நடந்தது. வியட்நாம் காரர் ரூபாய் ஐந்து லட்சத்திற்கு குறைந்து முடியாது என்று சொல்லிவிட்டார். ஆனால் பி.எஸ்.ஏ அவரை விட வில்லையாம் அந்த வைரங்களின் தரத்தினை எடுத்துச் சொல்லி அந்த விலைதான் பெரும் என்றாராம். வியட்நாம்காரருக்கு ஒரு நாள் டைம் கொடுத்துவிட்டு தாங்கள் தங்கியிருந்த அறைக்கு வந்து விட்டார்களாம். சுயம் ஆலிம்சா நாம் தங்கி பிரஜோனம் இல்லை ஊருக்குப் போய் விடலாம் என்றாராம். ஆனால் பி.எஸ்.ஏ, ‘பார் அந்த வியட்நாமி நாளைக்கு நம்மை வரச்சொல்லுவார்’ என்றாராம். அதன்படியே அடுத்த நாள் வியட்நாமி வியாபாரி அவர்களை வரச்சொல்லி பி.எஸ்.ஏ வாதத்தினை பாராட்டி வைரத்தினை பி.எஸ்.ஏ கேட்ட ரூபாய் மூன்று லட்சத்திற்கே கொடுத்தானாம். ஆகவே தொழிலில் சுமுகமான  அணுகு முறையே வெற்றிக்கு வழிவகுக்கும் என்பது பி.எஸ்.ஏயின் அணுகுமுறை ஒரு உதாரணமாக எடுத்துக் கொள்ளலாமே!
ஆகவே சிறிய முதலீட்டினை வைத்து சிறப்பாக சமுதாய மக்களை தொழில் அதிபராக்க அனைத்து அமைப்புகளும் முன் வரவேண்டும் என வேண்டுகிறேன்

நன்றி :டாக்டர் ஏ.பீ. முகம்மது அலி, பி.எச்.டி, ஐ.பீ.எஸ்(ஓ)

Read More

வாங்க தொழில் முனைவோர் ஆகலாம்

சொந்தமாக தொழில் செய்து வாழ்வில் முன்னேற விரும்புகிறீர்களா? வாழ்த்துக்கள். நிச்சயம் உங்களால் முடியும். மிகப்பெரிய தொழிலதிபராகும் தகுதி உங்களிடம் இருக்கிறது. கூடவே சில விஷயங்களை கவனமாக நீங்கள் பின்பற்றினால் போதும். வெற்றி நிச்சயம்! சரி, அந்த சில விஷயங்கள் என்னென்ன?
முதலில் தாங்கள் ஒரு தொழிலை நிறுவி வெற்றி பெறச்செய்யும் சாதனையில் ஈடுபட்டிருக்கிறோம் என்ற எண்ணம் மனதின் அடித்தளத்தில் இருக்க வேண்டும். இது முதல் விஷயம் மட்டுமல்ல, முக்கியமான விஷயமும் கூட. இதன் பிறகுதான் மற்ற குணங்கள். அவை:

1. தொழில் தாகம்

தொழிலைத் தொடங்கி அதை வெற்றிகரமாக நடத்த வேண்டும் என்ற தணியாத தாகம் வேண்டும்.

2. சிரித்த முகம்

நகல்வல்லர் அல்லரார்க்கு மாயிரு ஞாலம்
பகலும்பாற் பட்டன்(று) இருள்.
(திருக்குறள் 999)

அதாவது, பிறரோடு கலந்து பழகி மகிழ முடியாதவர்க்கு மிகப் பெரிய இந்த உலகம், ஒளியுள்ள பகற்காலத்திலும் இருளில் கிடப்பதாகும் என்கிறார் வள்ளுவர்.
எல்லாத் தொழிலிலும் பொதுமக்களுடன் நெருங்கிப்பழகும் அவசியம் ஏற்படும். ஆகவே, தொழில் முனைவோர் பொது மக்களிடம் சிரித்துப் பழகுகின்ற பழக்கத்தையும், குணத்தையும் பெற்றிருத்தல் வேண்டும். குறிப்பாக ஏற்கனவே தொழிலில் ஈடுபட்டுள்ளவர்களுடன் விரும்பிப் பழக வேண்டும்.

3. மனதில் உறுதி இருக்க வேண்டும்

முன் வைத்த காலை பின்வைக்காதே என்பதை மனதில் கொள்ள வண்டும். தொழிலின் தொடக்க காலத்தில் பல தடைகளை எதிர்கொள்ள நேரிடும். அச்சமயங்களில் மனம் தளராத உறுதி கொள்ள வேண்டும்.

4. முயன்றால் முடியும்

தொடங்கும் தொழில் வெற்றி அளிக்கும் என்ற நம்பிக்கை வேண்டும். நம்பினார் கெடுவதில்லை. மனமுண்டானால் வழி உண்டாகும் போன்ற பழமொழிகளை வழிகாட்டியாகக் கொள்ள வேண்டும். இந்த நான்கு விதிகளையும் கடைப் பிடித்து நடந்தால், வெற்றி நிச்சயம். ஆமாம், நீங்கள்தான் வெற்றி பெற்ற தொழில் முனைவோர்!                  

Read More