இனிப்பான வருமானம் தரும் தேனீ வளர்ப்பு

 கிராமத்தினர் முதல் நகரத்தினர் வரை அனைவரும் வீட்டில் இருந்தே எளிய முறையில் தேனீ வளர்ப்பில் வெற்றி பெற ஆலோசனைகள் வழங்குகிறார், மதுரையைச் சேர்ந்த ‘விபிஸ் இயற்கைத் தேனீப் பண்ணை’ உரிமையாளர் ஜோஸ்பின்.

வர்லாம் வாங்க!

குழந்தைகள் முதல் பெரியவர்கள் வரை அனைவருக்கும் அருமருந்து தேன். உலகம் முழுக்க இதற்கான வரவேற்பு அதிகம் இருக்கும் சூழலில், தேனில் கலப்படமும் பெருகிக் கொண்டே இருப்பதைத் தொடர்ந்து கேள்விப்படுகிறோம். காடுகள் அழிப்பு, இயற்கைச் சூழல் சீர்கேடு, தொழிலாளர் பற்றாக்குறை போன்ற காரணங்களால் சிறப்பான தேன் உற்பத்தி குறைந்துகொண்டே வருகிறது. அதேநேரம், தேனீ வளர்ப்பு மூலமாகத் தேன் உற்பத்தி என்பது கொஞ்சம் கொஞ்சமாக, பெருக ஆரம்பித்துள்ளது. வீடு, தோட்டம், மாடி என்று தேனீப்பெட்டிகளை வைத்து தேனீ வளர்ப்பில் ஈடுபட்டுவருகின்றனர். சுமார் 4 கிலோமீட்டர் சுற்றளவு வரையில் பறந்து சென்று தேன் சேகரிப்பில் தேனீக்கள் ஈடுபடும். வேளாண்மைப் பயிர்கள், மரங்கள் மற்றும் இயற்கைச் சூழல் நிறைந்த பகுதிகளில் தேனீ வளர்ப்பு நன்கு கைகொடுக்கும். கிராமப்புறங்கள்தான் என்றில்லை... நகர்ப் புறங்களில்கூட தேனீ வளர்ப்பில் ஈடுபடலாம். பழச்சாறு கொடுத்து தேனீ வளர்ப்பை மேற்கொள்ளலாம். வெளிநாடு களில் வெற்றி பெற்றுள்ள இத்தகைய தேனீ வளர்ப்பு, இந்தியா வில் அதிகம் பிரபலமாகவில்லை. ஆனால், தேனுக்கான தேவை அதிகமாக இருப்பதால் அனைத்துத் தரப்பினரும் இதில் இறங்கி வெற்றிபெறலாம்.

தேனீக்கள் விரும்பும் பழச்சாறு!

தேனீகளுக்குப் பெரிய எதிரியான ரசாயன உரம் மற்றும் ரசாயன பூச்சிக்கொல்லிப் பயன்பாடு அதிகரித்து வருகிறது. இதனால், தேனீக்களுக்குப் போதிய உணவு கிடைக்காமல் போவதால், அவை இடம்பெயர்கின்றன. இதுபோன்ற சூழலில், தேனீப் பெட்டியில் சர்க்கரைப்பாகுக் கரைசல் வைத்து தேனீக்களுக்கு உணவை உருவாக்குவார்கள். இதேபோல பழச்சாறு கொடுத்தும் தேனீ வளர்ப்பை மேற்கொள்ளலாம். சுற்றுவட்டாரத்தில் பூக்கள் இல்லாத பட்சத்தில்தான், தேனீக்கள் பழச்சாற்றைப் பருகும். இதற்காக, வாழை, சப்போட்டா, மா, பப்பாளி போன்ற ஏதாவதொரு பழத்துடன் தண்ணீர் சேர்த்து ஜூஸ் போல செய்து வடிகட்டி கிண்ணத்தில் தினமும் 100 மில்லி அளவில் ஒவ்வொரு பெட்டியிலும் வைக்கலாம். கிராமப் பகுதிகளில் ஒவ்வொரு பெட்டியிலும் மாதம்தோறும் தலா ஒரு கிலோ தேனை அறுவடை செய்யலாம். நகரப் பகுதியில் ஒன்றரை மாதத்துக்கு ஒருமுறை ஒரு கிலோ தேன் கிடைக்கும். கிலோ 450 ரூபாய் வரை விற்பனை ஆகிறது. பூக்களில் இருந்து சேகரிக்கப்படும் தேனுக்கு இணையாக இந்தத் தேன் இருக்காது என்றாலும், இந்தத் தேனும் ஆரோக்கியமானதே!

எறும்பு வருவதைத் தவிர்க்க...

தங்க அரளிப் பூவில் தேன் அதிகம் இருக்கும். இந்தப் பூச்செடி, முருங்கை உட்பட பல்வேறு செடிகளைச் சுற்றுவட்டாரத்தில் வளர்ப்பதால் தேனீக்கள் அதிகம் வரும். தேனீக்களின் பிரதான எதிரிகளில் எறும்புக்கும் இடம் உண்டு. பெட்டிகள் பொருத்தப் பட்டிருக்கும் ஸ்டாண்டைச் சுற்றி மஞ்சள்தூளை அவ்வப்போது தூவி விடுவதால் எறும்பு வருவதைத் தவிர்க்கலாம். தேனீக்களைத் தொந்தரவு செய்யாத வரைக்கும் அவற்றால் நமக்கு எந்தப் பிரச்னைகளும் வராது.

முதலீடு: தேனீக்களுடன்கூடிய ஒரு பெட்டி 4,000 ரூபாய்க்கு விற்கப்படுகிறது. தோட்டக்கலைத்துறை, வேளாண்துறை மூலம் தேனீப் பெட்டிகள் வாங்க 40 சதவிகிதம் மானியமும் கிடைக்கிறது.

மூலப்பொருள்கள்: 10,000 தேனீக்களுடன்கூடிய தேனீப் பெட்டிகள் விலைக்குக் கிடைக்கின்றன. தேனீ வளர்ப்பில் நம் உழைப்பு அதிகம் இருக்காது. ஆனால், முறையாக கவனித்துக்கொள்வதே மிகவும் முக்கியமானது.

பயிற்சி வகுப்பு: வேளாண் கல்லூரிகள், தோட்டக்கலைத்துறைப் பயிற்சி வகுப்புகளில் கலந்துகொள்ளலாம். நானும் இலவசமாகப் பயிற்சி அளிக்கிறேன்.

விற்பனை வாய்ப்பு: தேனீ வளர்ப்பை மேற்கொள்வது தெரிந்தால், நமக்குத் தெரிந்தவர்களே தேடி வருவார்கள். இயற்கை அங்காடிகள், மளிகைக்கடைகள், சந்தைகளிலும் விற்பனை செய்யலாம். தேனில் மதிப்புக்கூட்டல் உணவுப்பொருள்கள் தயாரித்தும் கூடுதல் வருமானம் ஈட்டலாம்.

நோட் பண்ணுங்க!

முதலில் இரண்டு பெட்டிகள் மட்டும் வாங்கி நிலத்திலோ, மொட்டைமாடியிலோ தேனீ வளர்ப்பை மேற்கொள்ளலாம். தேனீக்கள் நம் இருப்பிடச் சூழலில் சரியாக வாழ்வதை உறுதிசெய்த பிறகு, முதலில் வீட்டுக்கான தேனைச் சேகரித்து முறையான அனுபவம் பெற வேண்டும். பின்னரே சுயதொழிலாகச் செய்யலாம்.

* தேனீ வளர்ப்பு தொடர்பான ஆலோசனைகள் மற்றும் பயிற்சிகள் பெற, கோயம்புத்தூரில் உள்ள தமிழ்நாடு வேளாண்மை பல்கலைக்கழகத்தில் பூச்சியியல் துறையைத் தொடர்பு கொள்ளலாம். தொடர்புக்கு: 0422 - 6611214, 6611414

மாதம்தோறும் 6-ம் தேதி ஒருநாள் பயிற்சி வகுப்பு நடக்கும். அந்த நாள் விடுமுறை தினமாக இருந்தால், அதற்கு அடுத்த வேலை நாளில் பயிற்சி வகுப்பு நடைபெறும்.

பயிற்சிக் கட்டணம்: 500 ரூபாய் (ஜி.எஸ்.டி தொகை 18 சதவிகிதம் சேர்க்காமல்)

பயிற்சி நேரம்: காலை 9 மணி முதல் மாலை 5 மணி வரை

குறிப்பு: பயிற்சியில் கலந்துகொள்ள, முன்கூட்டியே போன் வாயிலாகப் பதிவு செய்துகொள்ள வேண்டும்.

Read More

தேனீ வளர்க்கும் முறை ..

‘பிள்ளைங்க பள்ளிக்கூடம் போற அளவுக்கு வளந்துட்டாங்க. வீட்டுல பெரிசா எந்த வேலையும் இல்லை. ஏதாவது செய்யலாமேன்னு தோணுச்சு. கூடுதலா 2 ஆயிரம் வருமானம் வந்தா அவருக்கு உதவியா இருக்கும். எங்காவது வேலை இருக்குமான்னு பத்திரிகைகள்ல ‘வேலைக்கு ஆள் தேவை’ விளம்பரங்களை பாத்துக்கிட்டு இருந்தப்போதான், மதுரை வேளாண் அறிவியல் மையம் தேனீ வளர்ப்பு பயிற்சி கொடுக்கிறதா செய்தி இருந்துச்சு. விளையாட்டா அந்த பயிற்சிக்குப் போனேன். தேனீக்கள் எனக்கு நிறைய பாடங்களை கத்துக் கொடுத்துச்சு. இன்னைக்கு தன்னிறைவா ஒரு வாழ்க்கை கிடைச்சதோட பல நூறு பெண்களுக்கு வழிகாட்டவும் வாய்ப்புக் கெடச்சிருக்கு...’’ - மேலே வந்து ஒட்டுகிற தேனீக்களை எடுத்து கீழே விட்டபடி மென்மையாகப் பேசுகிறார் ஜோஸ்லின்.

தேனீக்களை ‘அது’ என்று அஃறிணையில் அழைத்தால் முறைக்கிறார். கொஞ்சம் வேகமாக கையசைத்து விரட்டினால் பதறுகிறார். ‘‘தேனீக்கள் குழந்தைகளைப் போல... உங்களால் ஆபத்தில்லை என்று உணர்ந்தால் ஸ்நேகமாகி விடும்’’ என்று சிரிக்கும் ஜோஸ்லின் மதுரை கே.புதூரைச் சேர்ந்தவர். தேன் உற்பத்தி மற்றும் விற்பனையில் பல்வேறு புரட்சிகளை செய்தவர். 40 ஆயிரம் பேருக்கு தேனீ வளர்ப்பு பயிற்சியளித்திருக்கிறார். தேனீ வளர்ப்பின் மூலம் 300 பெண்களை தொழில்முனைவோராக்கி சுயசக்தியாக மாற்றியிருக்கிறார். வேம்புத்தேன், காப்பித்தேன், நாவல்தேன், முருங்கைத்தேன், லிஸ்ஸிதேன் என தனித்துவமான தேன் வகைகளை இயற்கையாக உற்பத்தி செய்கிறார். வேளாண் செம்மல், இயற்கை வேளாண் வித்தகி, விவசாய சாதனையாளர்... இப்படி வீடெங்கும் பட்டங்களும் பரிசுகளும் விருதுகளும் குவிந்து கிடக்கின்றன.

‘‘எங்க குடும்பம் பாரம்பரிய விவசாயக் குடும்பம். அப்பா தலைமையாசிரியரா இருந்தாலும் விவசாயத்துல தீவிர ஈடுபாடு உண்டு. புதுசு புதுசா நிறைய முயற்சிகள் செய்வார். பிளஸ்டூ படிக்கும்போதே எனக்கு திருமணம் ஆயிடுச்சு. கணவர் செல்வராஜ் வீடியோ கடை வச்சிருந்தார். ஒரு பையன், ஒரு பொண்ணு. சாப்பாட்டுக்கு சிரமமில்லைன்னாலும், பிள்ளைகளுக்குன்னு பெருசா எதுவும் சேமிக்க முடியலே. கொஞ்சம் நெருக்கடியான சூழ்நிலை... அப்போதான் தேனீ வளர்ப்பு பயிற்சிக்குப் போற வாய்ப்புக் கிடைச்சுச்சு. தேனீக்களோட வாழ்க்கை முறை, உழைப்பு எல்லாமே எனக்குள்ள இனம்புரியாத உத்வேகத்தை உருவாக்குச்சு.

தேனீ வளர்க்கணும்னா சின்னதா ஒரு தோட்டம் வேணும். எங்க வீட்டுல அதற்கான வாய்ப்பில்லை. என் தங்கை ராஜரீஹாவுக்கு பெரிய தோட்டம் இருந்துச்சு. அவகிட்ட பேசிட்டு 10 பெட்டிகளைக் கொண்டு போய் அந்தத் தோட்டத்துலயே வச்சேன்.. ஒவ்வொரு வாரமும் சனி, ஞாயிறுகள்ல பிள்ளைகளைக் கூட்டிக்கிட்டு தோட்டத்துக்குப் போய் பாப்பேன். 2 மாதம் கழிச்சு பெட்டியைப் பிரிச்சுப் பாத்தப்போ 8 கிலோ தேன் கிடைச்சுச்சு. ரொம்ப சந்தோஷமா இருந்துச்சு. உறவுக்காரங்களுக்கு எல்லாம் கொடுத்தது போக 2 கிலோ தேனை விற்பனையும் செஞ்சேன். முதன்முதலா நான் சம்பாதிச்ச காசு.

தேனீக்களோட குணம், செயல்பாடுகளை ஓரளவுக்கு கணிச்சுட்டேன். ராணித்தேனீதான் கூட்டோட தலைவி. ராணித்தேனீ இல்லைன்னா வேலைக்காரத் தேனீக்கள் ஒண்ணு சேந்து உடனடியா ஒரு ராணித்தேனீயை உருவாக்கிடுவாங்க. ராணித்தேனீ வளர்ந்தபிறகுதான் கூட்டோட முழுமையான வேலைகள் தொடங்கும். என்னோட 10 பெட்டிகள்ல இருந்து வேலைக்காரத் தேனீகளை பிரிச்செடுத்து மேலும் 10 பெட்டிகள் உருவாக்குனேன். புதுசா பத்து ராணித்தேனீக்கள் உருவாச்சு.

நான் தேனீ வளர்க்கிறதைக் கேள்விப்பட்டு சிவகங்கை மாவட்டத் தோட்டக்கலைத்துறை அதிகாரிகள், சில பெண்களுக்கு பயிற்சியளிக்கக் கூப்பிட்டாங்க. பயிற்சி பெற்ற பெண்கள் என்கிட்ட ‘பெட்டிகள் செஞ்சு தாங்க’ன்னு கேட்டாங்க. பெட்டிகளோட சேத்து ராணித்தேனீக்களையும் உருவாக்கி கொடுத்தேன். முதன்முறையா 62 பெட்டிகள் விற்பனை செஞ்சேன். தேனை விட பெட்டிகள் விற்பனையில லாபம் கூடுதலா கிடைச்சுச்சு. அதுக்குப் பிறகு நிறைய பேர் பயிற்சிக்கு வரத் தொடங்கினாங்க. நானும் பெட்டிகளை அதிகமாக்கி சில கடைகளுக்கு ரெகுலரா தேன் கொடுக்க ஆரம்பிச்சேன்.

ஒரு நல்ல தொடக்கம் அமையுற போது, வாழ்க்கையில சறுக்கல்களும் வரத்தானே செய்யும்? திடீர்னு என் பொண்ணுக்கு உடம்பு சரியில்லாமப் போச்சு. கேன்சர். வாழ்க்கையில பிடிப்பே இல்லாமப் போச்சு. அவளை மீட்க போராடினோம். அலோபதி, சித்தா, ஆயுர்வேதம்னு எல்லா முயற்சிகளும் செஞ்சு பாத்தோம். முடியலே... வந்த வேகத்தில எங்களை விட்டுப் போயிட்டா.. அந்த இழப்பு என்னை முடக்கிப் போட்டுடுச்சு.

2 மாதம் என் கணவரும் வேலைக்குப் போகலை. பொருளாதார நெருக்கடி. தேன் பெட்டியைப் போய் பார்த்தா எறும்புகள் ஊறிக்கிட்டு இருக்கு. ஒரு தேனீயும் இல்லை. எல்லாமே என்னை விட்டுப் போன மாதிரி இருந்துச்சு. இனிமே எதுக்காக கஷ்டப்படணும், எதுவுமே வேணாம்னு இருந்துட்டேன். தோட்டக்கலைத்துறை அதிகாரிகள், உறவுக்காரங்க எல்லாரும் இந்த வேதனையில இருந்து மீளனும்னா திரும்பவும் நீ தேனீ வளர்ப்புல இறங்கு... அப்போதான் உன் கவனம் திசைமாறும் னு சொன்னாங்க. ஒரு கட்டத்துல நானும் அதை உணர்ந்தேன்.

அங்கே இங்கே கடனை வாங்கி 200 பெட்டிகள் போட்டேன். கண்ணும் கருத்துமா தேனீக்களைப் பாதுகாத்தேன். கிடைச்ச தேனை இயற்கை அங்காடிகளுக்கு அனுப்பினேன். பயிற்சியும் கொடுக்கத் தொடங்கினேன். ஒவ்வொரு மாதமும் 70 - 100 வரை வந்து பயிற்சி எடுத்துக்குவாங்க. எல்லாருக்கும் நானே தேன் பெட்டி செஞ்சு கொடுத்தேன். ஓரளவுக்கு அந்த வேதனையில இருந்து மீண்டேன்...’’ - குரல் கம்ம பேசுகிறார் ஜோஸ்லின்.

‘‘காதி துறையில ‘கேவிஐசி’ன்னு ஒரு பிரிவு இருக்கு. தொழில்முனைவோர்களுக்கு கடன் வழங்குற அமைப்பு. ‘35 சதவிகித மானியத்துல 25 லட்சம் ரூபா லோன் தர்றோம். தொழிலை பெரிசா செய்யிங்க’ன்னு சொன்னாங்க.

எனக்கு மலைப்பா இருந்துச்சு.. என்னை நம்பி 25 லட்சம் கடன் தர ஒரு நிறுவனம் தயாரா இருக்கு... அவ்வளவு பெரிய தொகையை வாங்கி என்ன செய்றதுன்னு தெரியலை. ‘10 லட்சம் மட்டும் கொடுங்க’ன்னு வாங்கினேன். அலங்காநல்லூர் பக்கத்துல கொண்டையாம்பாடியில கொஞ்சம் நிலம் வாங்கி 500 பெட்டிகள் போட்டேன். இரவு பகல் பாக்காம உழைச்சேன். மாதம் 500 கிலோ தேன் அறுவடை ஆச்சு. அடுத்த கட்டமா தேனை அப்படியே விக்கிறதை விட மதிப்பூட்டி வித்தா லாபம் கூடுதலா கிடைக்குமேன்னு தோணுச்சு.
தேன் ஒரு அப்பழுக்கில்லாத மருந்து. அதுல எந்தப் பொருளை கலந்தாலும் அதுக்கும் மருத்துவ சக்தி வந்துடும். இஞ்சி, துளசி, நெல்லிக்காய், பாதாம் பருப்பு, முந்திரிப்பருப்பு, ஆப்பிள், கேரட், மாம்பழம், பூண்டு, பேரிச்சை, அத்திப்பழம், ரோஜாப்பூ, செம்பருத்திப்பூ... இதைத் தனித் தனியா மிக்ஸ் பண்ணி, ஆப்பிள் தேன், இஞ்சித்தேன்னு விற்பனை செஞ்சேன். நல்ல வரவேற்பு. மேலும் மேலும் புதுசா எதையாவது செய்யணும்கிற வேட்கை அதிகமாகிட்டே இருந்துச்சு.

பொதுவா, ஒரிஜினல் தேன்ல 38 சதவிகிதம் குளுக்கோஸ் இருக்கு. அதனால குறிப்பிட்ட நாளுக்கு மேல தேன் உறைஞ்சு போகும். கலரும் மாறிடும். அசிடிக் ஆசிட் அல்லது சிட்ரிக் ஆசிட் கலந்தா கலர் மாறாது. பெரிய நிறுவனங்கள் இதைக் கலந்துதான் விக்கிறாங்க. ஆனா, நான் எதையும் கலக்காம எடுத்த தேனை அப்படியே மார்க்கெட்டுக்கு அனுப்புவேன். அதனால ஒவ்வொரு முறையும் தேன் ஒவ்வொரு கலர்ல இருக்கும். எந்த சீசன்ல எந்த பூ பூக்குதோ, அதுக்குத் தகுந்த மாதிரி கலர் இருக்கும்.

இதை கடைக்காரர்கள் குறையா சொல்லும்போதுதான் அந்த யோசனை வந்துச்சு. பல பூக்கள் தேனா இல்லாம, தனித்தனியா ஒவ்வொரு பூவுல இருந்தும் தேனை எடுத்தா என்ன? கேட்க நல்லாயிருந்தாலும் அது அவ்வளவு எளிமையான விஷயமில்லை. இதுவரை தமிழகத்துல யாரும் அந்த மாதிரி முயற்சியில இறங்கலே. தைரியமா நான் இறங்கினேன். முதல்ல தமிழகம் முழுக்க அலைஞ்சு திரிஞ்சு ஒரு ஆய்வு செஞ்சேன். தமிழகத்துல, எங்கெங்கே எந்தெந்த மரங்கள் இருக்கு, எந்தப்பூ எந்த மாதத்துல பூக்கும்னு ஒரு கணக்கெடுத்தேன்.

ஒரு தேனடை அல்லது தேன்பெட்டியைச் சுத்தி 2 கிலோமீட்டர் தொலைவுல, 60 சதவிகிதம் எந்தவகையான மரங்கள் இருக்கோ, அந்த தேன் அந்த மரத்தின் தன்மையை ஒத்திருக்கும். அதாவது 2 கி.மீ. தொலைவுல நிறைய நாவல் மரங்கள் இருந்தா அங்கே கிடைக்கிற தேன் நாவல்தேன். நாவல் பழம் மற்றும் பூவுல என்னென்ன மருத்துவ குணங்கள் இருக்கோ அதெல்லாம் அந்த தேன்லயும் இருக்கும். இதேமாதிரி ஒவ்வொரு பூவுல இருந்து கிடைக்கிற தேனுக்கும் தன்மை, கலர், சுவை எல்லாமே மாறும்.

அதன்படி, இடங்களைத் தேடித்தேடி பெட்டிகளை வச்சேன். முருங்கைத்தேன், கூர்க்தேன், லிஸ்ஸி தேன், வேம்புத்தேன், குங்குமப்பூ தேன், நாவல் தேன், சூரியகாந்தி தேன்... இப்படி தனித்தன்மையா தேன் கிடைச்சுச்சு. ஒவ்வொண்ணும் தனித்தனி சுவை, மணம், குணத்தோட இருந்துச்சு. ஆட்களை வச்சு மலைத்தேனும் சேகரிச்சேன். எனக்குன்னு ஒரு பிராண்ட் ரெடி பண்ணி, அக்மார்க் வாங்கி, பெரிய அளவுல மார்க்கெட் செய்ய ஆரம்பிச்சேன். கணவரும் வேலையை விட்டுட்டு முழுமையா என்கூட தொழில்ல இறங்கிட்டார்...’’ - மலைக்க வைக்கிறார் ஜோஸ்லின்.

தேனீ வளர்ப்பு மூலம் வெறும் தேன் மட்டும் கிடைப்பதில்லை. விலை உயர்ந்த வேறு பல பொருட்களும் கிடைப்பதாகச் சொல்கிறார் ஜோஸ்லின். ஒவ்வொரு பெட்டியின் வாசலிலும் சிறிய கருவி ஒன்றை பொருத்தியிருக்கிறார். தேனீக்கள் பூக்களில் இருந்து சேகரித்து கால்களில் ஏந்திவரும் மகரந்தத்தை அந்தக் கருவி தனியாக பிரித்துவிடுகிறது. ஒரு கிலோ மகரந்தம் 3000 ரூபாய். அறுசுவையும் கொண்ட இந்த மகரந்தம், ‘ஆண்மைக்குறைவுக்கு அரு மருந்து. உடலுக்கு சக்தியூட்ட வல்லது. கிட்னி பழுதுக்கும் மருந்து’ என்கிறார் ஜோஸ்லின்.

ராணித் தேனீயின் உணவுக்காக வேலைக்காரத் தேனீக்கள் உற்பத்தி செய்யும் ராயல் ஜெல்* 1 கிலோ 1 லட்சம் ரூபாயாம். ஹைபுரோட்டீன் உணவு இது. இதைச் சாப்பிட்டுத்தான் தன் வாழ்நாள் முழுதும் ராணித்தேனீ முட்டைகளை இட்டுத் தள்ளுகிறது. இது மலட்டுத்தன்மையை நீக்கும் மருந்தாம். அடையில் கிடைக்கும் தேன்மெழுகானது பெயின்ட், வார்னிஷ், மெழுகுவர்த்தி என 250 வகை பொருட்கள் தயாரிக்கப் பயன்படுகிறது. கிலோ 250 ரூபாய்க்கு வாங்கிக்கொள்ள ஆளாகப் பறக்கிறார்களாம்!

‘‘தேனீ வளர்ப்பை முறையா செஞ்சா அதுமாதிரி லாபம் தர்ற தொழில் வேறில்லை. காஷ்மீர்ல 1989ல 5 பெட்டிகளோட தொழிலை ஆரம்பிச்ச ஒருத்தர், இப்போ 50 ஆயிரம் பெட்டிகள் வச்சு தேனெடுக்கிறார். 48 நாடுகளுக்கு எக்ஸ்போர்ட் பண்றார். லோடு ஏத்தி இறக்க மட்டும் 80 டிரக்ஸ் வச்சிருக்கார். மூட்டை தூக்கிக்கிட்டிருந்த ஒருத்தர் தேனீ வளர்ப்பு மூலம் இப்போ 5 கார்கள் வாங்கியிருக்கார். நான் 2 ஆயிரம் சம்பாதிச்சா போதும்னு நினைச்சேன். இப்போ ஓரளவுக்கு தன்னிறைவு அடைஞ்சுட்டேன். இன்னும் பெரிய அளவுல செய்யணும். நிறைய பெண்களுக்கு பயிற்சி கொடுத்து பொருளாதார சக்தியா அவங்களை மாத்தணும்... இன்னும் நிறைய கடமைகள் இருக்கு...’’ என்றபடி தேனீக்களோடு ஸ்னேகமாகிறார் ஜோஸ்லின். இந்த ராணித்தேனீயின் வருகையை எதிர்பார்த்துக் காத்திருந்த பிற தேனீக்கள் உற்சாகமாகப் பறக்கின்றன!

தேன் வாழ்க்கை
------------------------

தேனீக்களின் வாழ்க்கை மிகவும் கட்டுக்கோப்பானது. அது ஒரு பெண்ணாதிக்க உலகம். ராணித் தேனீ தான் கூட்டின் தலைவி. ராணியின் கீழ்படிந்து தம் காலம் முழுதும் சேவையாற்றுவதே வேலைக்காரத் தேனீக்களின் ஜென்ம பலன். ஆண்தேனீக்களும் ராணிக்கு அடிபணிந்துள்ள சேவகர்கள்தான். மற்ற தேனீக்களைவிட ராணித்தேனீ தேஜஸாக இருக்கும். வடிவமும் சற்று பெரிது. ராணியின் வேலை, கூட்டை கண்காணிப்பது, முட்டையிடுவது, நிர்வகிப்பது. மற்ற தேனீக்களின் ஆயுள்காலம் 2 மாதம். ராணித்தேனீயின் ஆயுள் காலமோ 3 ஆண்டுகள். காரணம், உணவு. மற்ற தேனீக்களைப் போல வெறும் மகரந்தங்களை சாப்பிடுவதில்லை. அதற்கென ஸ்பெஷல் உணவு உண்டு. பெயர் ராயல் ஜெல்லி. 7 முதல் 14 நாட்கள் வயதுடைய தேனீக்களின் உடலில் சுரக்கும் ஒருவித ஹைபுரோட்டீன் திரவம்தான் ராயல் ஜெல்லி. இதுதான் ராணித்தேனீயாரின் தேஜஸுக்கும் நீண்ட ஆயுளுக்கும் முட்டைகள் இட்டுத் தள்ளுவதற்கும் காரணம். ஒரு கூட்டில் 50 முதல் 100 ஆண் தேனீக்களும் பலநூறு வேலைக்காரத் தேனீக்களும் இருக்கும். ராணித்தேனீ வாழ்நாளில் ஒருமுறை மட்டுமே ஆணுடன் இணையும். ஆண்கள் மத்தியில் அந்தத் தகுதியைப் பெறுவதற்கு கடும் போட்டி இருக்கும். அந்தப் போட்டியில் வெற்றி பெறும் ஆண் தேனீக்கு மிக உயர்ந்த பரிசும் கிடைக்கும். அது மரணம்!

ராணித்தேனீயார் பருவத்துக்கு வந்ததும், ராயல் ஜெல்* உபயத்தில் ஜில்லென்று சிறகு விரித்து வெகு உயரத்துக்கு பறக்கத் தொடங்கிவிடுவார். ராணியாரின் விருப்பமறிந்து ஆண் தேனீக்கள் போட்டி போட்டுக்கொண்டு அந்த உயரத்துக்கு பறக்க முயற்சிப்பார்கள். சம உயரத்துக்கு பறந்துவரும் ஆண் தேனீயுடன் மட்டுமே ராணி இணைகூடும். கூடல் முடித்ததும் அந்த ஆண் தேனீ இறந்துவிடும். ஆனால், அதற்குள்ளாக, பல லட்சம் தேனீக்களை உருவாக்கவல்ல சக்தியை ராணியாருக்குத் தந்துவிடும். அது முதல் 3 வருடங்களுக்கு தொடர்ந்து லட்சக்கணக்கில் முட்டையிட்டுக் கொண்டே இருக்கும் ராணித்தேனீ!

வேலைக்காரத் தேனீக்கள் பிறப்பு முதல் இறப்பு வரை ஒருநொடி ஓய்வில்லாமல் சேவையாற்றுகின்றன. வயது வாரியாக அவர்களுக்கு பணிகள் நிர்ணயம் செய்யப்படும்.

1 முதல் 3 நாள் வயதுள்ள தேனீக்கள் - கூட்டைச் சுத்தம் செய்தல் உள்ளிட்ட கூ(வீ)ட்டு வேலைகள்.

3 முதல் 6 நாள் வயதுள்ள தேனீக்கள் - தேனீக்கள் வயிற்றில் சுமந்துவந்து கூட்டில் வைக்கும் இனிப்புத் துளிகளை தங்கள் சிறகால் விசிறி திக்காக்கி கூட்டில் ஸ்டோர் செய்யும் பணி.

7 முதல் 14 நாள் நாள் வயதுள்ள தேனீக்கள் - முட்டைகள் இட்டு சோர்வாகும் ராணித்தேனீயாருக்கு ராயல் ஜெல்லியை உருவாக்கி, ஊட்டும் வேலை.

14 முதல் 21 நாள் வயதுள்ள தேனீக்கள் - பொறியாளர்கள். உடலில் சுரக்கும் மெழுகைக் கொண்டு கூட்டைக் கட்டுவது இவர்களின் வேலை.

21 முதல் 23 நாள் வயதுள்ள தேனீக்கள் - இப்பருவத்தில் உள்ள தேனீக்கள் மூன்று குழுக்களாக பணிபுரிகின்றன. 1. மருத்துவ தேனீக்கள். பணிக்குச் சென்று திரும்பும்போது காலொடிந்த, சிறகொடிந்த தேனீக்களுக்கு சிகிச்சை அளிப்பது இவற்றின் பணி. 2. சிப்பாய் தேனீக்கள். அருகருகே இரண்டு தேனடைகள் இருந்தால் அவை, இந்தியாவும் பாகிஸ்தானும் போலத்தான். இங்குள்ள தேனீ அங்கு சென்றால் அவை விரட்டுவதும், அங்குள்ள தேனீ இங்கு வந்தால் இவர்கள் விரட்டியடிப்பதும் நடக்கும். மோதலும் உருவாகலாம். உயிரும் பறிபோகலாம். கூட்டைக் கலைப் பவர்களை விரட்டி விரட்டிக் கடிப்பது இவர்களே. 3. பிணம் தூக்கித் தேனீக்கள். அந்தப் போரில் உயிரிழக்கும் தேனீக்களை கூட்டில் இருந்து வெளியேற்றுவது இவர்களின் வேலை.

23 முதல் 25 நாள் வயதுள்ள தேனீக்கள் - இவர்களது பணி மிகவும் முக்கியத்துவம் வாய்ந்தது. ஒற்றர்கள். கூட்டில் இருந்து பூக்கள் எவ்வளவு தொலைவில் இருக்கிறது என்பதை கண்டறிந்து வருவது இவர்களது வேலை. வயிற்றை ஆட்டியபடி வட்டம் போட்டு தூரத்தை உணர்த்துவார்கள்.

25 முதல் 60 நாள் வயதுள்ள தேனீக்கள் - ஒற்றர்கள் சொல்லும் திசையில் பறந்து சென்று கால்களில் மகரந்தத்தையும், வயிற்றில் மதுரத்தையும் சுமந்து வருவது இவர்களின் வேலை.
ஒரு தேனீ தன் வாழ்நாளில் 1 டீஸ்பூன் தேனை சேகரிக்கும். அதற்காக நாளொன்றுக்கு 50 ஆயிரம் மலர்களில் அமர்ந்து எழுந்துவரும். என்ன தலைசுற்றுகிறதா!

என்ன முதலீடு? எவ்வளவு லாபம்?
-------------------------------------------------

ரூ.10 ஆயிரம் முதலீட்டில் தேனீ வளர்ப்புத் தொழிலை தொடங்கலாம். 6 பெட்டிகள், தேன் பிரித்தெடுக்கும் மெஷின் எல்லாம் இதில் அடங்கும். தோட்டங்கள் அல்லது பசுமை அடர்ந்த பகுதிகளில் செய்யலாம். வாரம் ஒருநாள் ஒருமணி நேரம் மட்டும் செலவு செய்தால் போதும். ஒரு மாதத்துக்கு 8 முதல் 10 கிலோ தேன் கிடைக்கும். 1 கிலோ தேன் ரூ.200 - 300 வரை விற்பனையாகிறது. இதோடு அரை கிலோ மகரந்தமும் கிடைக்கும். இதை 1500 ரூபாய்க்கு விற்கலாம். வருடம் ஒருமுறை 2 கிலோ மெழுகு கிடைக்கும். 1 கிலோ 250 ரூபாய்க்கு விற்க முடியும்.
ஜோஸ்லினை தொடர்பு கொள்ள : 9865555047

Read More

இத்தாலிய தேனீ வளர்த்து லட்சம் வருமானம் ஈட்டும் இல்லத்தரசி.

தேனீக்கள் மட்டும்தானா?...சுறுசுறுப்பு, அதை வளர்க்கும் இந்த.... இல்லத்தரசியும் படு சுறுசுறுப்புத்தான். இயற்கை எழிலுடன் தென்னை மரங்கள் சூழ்ந்த கோவையை அடுத்த சுல்தான் பேட்டை ஒன்றியத்தில் உள்ள மலை மந்திரிபாளையம் கிராமத்து பண்ணை வீட்டில், தேன்பண்ணை தொழிலில் வருமானம் நல்ல தேடும் இல்லத்தரசியாக திகழ்பவர் ரேவதி (வயது26). கணவர் திருஞான சம்பந்தம் (33) துணையோடு, வீட்டில் மட்டுமின்றி, கோவை, திருப்பூர் மாவட்டங்களை தாண்டி பிற மாவட்டங்களிலும் சீசனுக்கு தகுந்தாற்போன்று தேனீ பெட்டிகளை வைத்து, வருமானம் ஈட்டி வருகிறார். இவர்களுக்கு ஒரே மகன் திருநாவுக்கரசு (6). தேனீ...தேன்...பற்றி அவரிடம் கேட்ட போது தேனாக பேசத்தொடங்கினார். அது பற்றி பார்க்கலாம்:–

தேனீ வகைகள்

இந்தியாவில் தேனீ வளர்ப்பில் கொசுத்தேனீ, கொம்புத்தேனீ, அடுக்குத்தேனீ, மற்றும் வெளிநாட்டு வகையான இத்தாலி தேனீ என 5 வகை தேனீக்கள் உள்ளன. இதில் தற்போது இத்தாலி ரக தேனீதான் தேனீ வளர்ப்பில் லாபகரமாக உள்ளது.இந்த இத்தாலி ரக தேனீக்கள் அந்த நாட்டில் இருந்து முதன் முறையாக கடந்த 1060–ம் ஆண்டில் பஞ்சாப் மாநிலத்தில் கொண்டு வரப்பட்டு வளர்க்கப்பட்டது. இதன் பின்னர் 2006–ம் ஆண்டு தமிழ்நாட்டுக்கு கொண்டுவரப்பட்டு வளர்க்கப்பட்டது. தற்போது இந்த தேனீ வளர்ப்பு ராஜ பாளையம், அரவக்குறிச்சி, கோவை பகுதிகளில் விறுவிறுப்பாக காணப்படுகிறது. சுமார் 130 பெட்டிகளில் இத்தாலிய தேனீக்களை வைத்து வளர்த்து வருகிறோம். ஆனால் ஆரம்ப காலத்தில் நாட்டு தேனீக்களை வைத்து வளர்த்தோம்.

ஆனால் அவற்றில் தாய்–சேய் புரூடு வைரஸ்நோய் தாக்குதல் அதிகமாக இருந்தது. இதனால் அந்த தேனீக்களில் இறப்பு விகிதம் அதிகமாக இருந்து. இதனால் தேன் உற்பத்தியின் அளவு மிகவும் குறைந்து காணப்பட்டது. மேலும் இந்த நாட்டு தேனீக்கள், கூட்டில் நன்றாக தேன் இருக்கும் போது திடீரென அந்த தேனீக்கள் பெட்டியை விட்டு விட்டு ஓடிப்போய்விடும். இதற்கு காரணம் வைரஸ் நோய் தாக்குதல் தான். ஒரு கூட்டில் வைரஸ் நோய்தாக்கி இறக்கும் தேனீக்களை பார்த்ததும், மற்ற தேனீக்கள் அங்கிருக்காமல் பறந்து விடும். இதபோன்ற நெருக்கடி நிலை நாட்டு தேனீ வளர்ப்பில் இருந்தது. இதனால் எங்களுக்கு ஆரம்ப கால தேன் உற்பத்தி லாபகரமாக இல்லை.

நோய் எதிர்ப்பு சக்தி படைத்தது

இந்த நிலையில் இத்தாலி தேனீயில் நோய் பற்றிய பிரச்சினை எதுவும் கிடையாது. இந்த வகைகள் நோய் எதிர்ப்பு சக்தி மிக்கது. இதை கோவை வேளாண் பல்கலைக்கழகம் பரிந்துரை செய்ததால் அதைவாங்கி வளர்க்க தொடங்கினோம். இதனால் எங்களின் தேன் பண்ணை தொழில் விறுவிறுப்பானது. இந்த தேனீக்களை பொறுத்தவரை நோய் பிரச்சினை இருந்தது இல்லை. ஆனால் தீவனம் அதிகம் தேவைப்படுகிறது. இதற்காக தேன் அதிகமாக இருக்கும் இடங்களில் அவற்றை வைத்து வளர்க்க வேண்டும். குறிப்பாக பூக்கள் அதிகம் உள்ள இடங்களில் வைத்து வளர்த்தால் தேன் அதிகமாக கிடைக்கும். எங்கள் தோட்டம் தவிர மற்ற விவசாயிகளின் தோட்டங்களில் குறிப்பாக முருங்கை, சூரிய காந்தி, கடுகு போன்ற பயிர்கள் வளரும் தோட்டங்களில் இத்தாலி தேனீ பெட்டிகளை வைத்து நாங்கள் தேன் எடுத்து வருகிறோம். இதன் மூலம் சம்பந்தப்பட்ட விவசாயிகளுக்கும் அயல்மகரந்த சேர்க்கை நடைபெறுவதால் பயிர்விளைச்சல் அமோகமாக உள்ளது.

மேலும் இத்தாலி தேனீக்கள் எந்த சூழ்நிலையிலும் பெட்டியை விட்டு ஓடிவிடாது. ஆனால் எறும்பு, குழவி பிரச்சினை இருந்தால் நம் நாட்டுரக தேனீக்கள் பெட்டியை விட்டு ஓடிப்போகும். அதற்கு தீவனம் இல்லாத கால கட்டத்தில் கரும்பு ஜூஸ் வைத்து கொடுப்போம். இந்த ஜூசை தேனீக்கள் வளரும் பெட்டியின் ஒரு பகுதியில் வைத்து விடுவோம். அதை தேனீக்கள் வந்து குடிக்கும். சர்க்கரை தண்ணீர் கொடுக்கும் போது பாக்டீரியா நோய்கள் வந்துவிடும். ஆகவே அதை தவிர்த்து விடுவோம். இது தவிர குளுக்கோ விட்டா கொடுக்கலாம். ஆனால் அது அதிக விலை என்பதால் தொடர்ந்து கொடுக்க முடியாது. முருங்கை, கொத்துமல்லி தேன் மருத்துவ குணம் நிறைந்ததாக உள்ளது. ஆனால் இவைகளின் சீசன் காலங்களில் ஆண்டுக்கு 3 மாதங்கள் தான் தேன் எடுக்க முடியும். கொத்த மல்லி ஒரு மாதத்தில் தான் எடுக்க முடியும்.

ரூ.1 லட்சம் வருமானம்

3 ஆயிரம் தேனீக்களை உள்ளடக்கிய இத்தாலிய தேனீப்பெட்டி ஒன்றின் விலை ரூ.6,500. இதனை பூக்கள் அதிகம் உள்ள தோட்டங்களில், நிழலான இடங்களில் 1½ அடி உயரத்தில் வைக்க வேண்டும். இதற்காக பிரத்யேக ஸ்டாண்டுகள் உண்டு. ஒரு பெட்டிக்கும், அடுத்த பெட்டிக்கும் 10 அடி இடைவெளி இருக்க வேண்டும். பெட்டியில் எறும்பு, பல்லி, போன்றவை ஏறாமல் பார்த்துக்கொள்ள வேண்டும். பெட்டியை வைத்ததில் இருந்து 130 நட்களில் 3 ஆயிரம் தேனீக்கள் 12 ஆயிரம் தேனீக்களாக மாறும். இந்த காலகட்டத்துக்கு பிறகு தேனை அறுவடை செய்யலாம். முதல் அறுவடையில் இருந்து 15 நாட்கள் இடைவெளியில் தொடர்ந்து அறுவடை செய்யலாம். ஒவ்வொரு முறை சேகரிக்கும் போதும், 2 கிலோ அளவுக்கு குறையாமல் தேன் கிடைக்கும். பெட்டியில் தேனீக்கள் பெருகிய பிறகு, அதில் இருந்து அடுத்த பெட்டியை உருவாக்கி கொள்ள முடியும். தேனீக்கள் இல்லாத காலி பெட்டி 2,500 ரூபாய்க்கு கிடைக்கிறது.

ஒரு பெட்டியில் இருந்து மாதம் சராசரியாக 4 கிலோ அளவுக்கு தேன்கிடைக்கும். பெட்டியை ஒரே இடத்தில் வைத்தால் பெரிய அளவில் லாபம் பார்க்க முடியாது. ஒவ்வொரு பருவத்திலும் எந்தெந்த பகுதியில் பூக்கள் அதிகமாக உள்ளதோ? அதை தெரிந்து கொண்டு போய் பெட்டிகளை வைக்க வேண்டும். அப்போது தான் ஆண்டு முழுவதும் வருமானம் பெற முடியும். முருங்கை கொத்தமல்லி, கடுகு, சூரிய காந்தி,பந்தல் பயிர்கள், தென்னை ஆகியவற்றில் அதிகளவில் தேன் கிடைக்கும். பொங்கலூர், சுல்தான் பேட்டை பகுதிகளில் வெங்காய சாகுபடி அதிகம். இந்த பகுதிகளில் பூக்கிற பருவத்தில் பெட்டிகளை வைச்சு தேன் எடுப்போம். ஒரு பெட்டியில் இருந்து மாதம் சராசரியாக 5 கிலோ தேன் கிடைக்கும். நாங்கள் சுமார் 130 பெட்டிகள் வரை வைத்துள்ளோம். இதன் மூலம் சராசரியாக மாதம் 5 ஆயிரம் கிலோ வரை தேன் உற்பத்தி செய்கிறோம். இந்த தொழிலில் நான், மற்றும் எனது கணவர், மற்றும் மாமனார் வேலுச்சாமி, மாமியார் அன்னப்பூரணி என 4 பேர் ஈடுபடுகிறோம். இதனால் எங்களின் மாதம் ரூ.1 லட்சம் வரை வருமானம் கிடைக்கிறது. இதற்காக நாங்கள் எங்களிடம் வருகிற அனைவருக்கும் பயிற்சிகள் அளித்து வருகிறோம்.

இத்தாலிய தேனீக்களை வீடுகளில் கூட வளர்த்து லாபம் சம்பாதிக்க முடியும். வீட்டு கொல்லை புறத்தில் ஒரு பெட்டி வைத்தால் மாதம் 4 கிலோ தேன் கிடைக்கும். ஒரு கிலோ தேன் குறைந்த பட்சம் ரூ.250 ஆகும். ஒரு பெட்டியில் இருந்து வாரா வாரம் தேன் எடுக்கலாம். இதன் மூலம் மாதம் ரூ.1000 வரை வருமானம் கிடைக்கும். பெட்டி வைக்கும் இடம் கிராமப்புறமாக, விவசாய நடைபெறும் பகுதியாக இருந்தால் நல்லது. நகரத்தில் வசிப்பவராக இருந்தால் பெட்டிகளை வைக்க மரங்கள் அதிமாக உள்ள பகுதியாக இருக்க வேண்டும். இதற்கு முதலீடு என்பது பெட்டி வாங்கும் செலவுதான். ஒரு பெட்டிக்கு ரூ.6,500 ஆகும்.

மகரந்தம் கிலோ ரூ.2000

தேனீக்கள் கொட்டுவது அக்கு பஞ்சர் வைத்தியத்தில் நல்லது என்கிறார்கள். மூட்டு வலி, நரம்பு வலிகள் வராது. ஒரு சில ஆஸ்பத்திரிகளில் இந்த சிகிச்சைக்காக செயற்கையாக தேனீக்களை கொட்ட வைக்கின்றனர். இது தவிர தேன் பெட்டிகளில் தேனீக்கள் தங்கள் கால்களில் எடுத்து வரும் மகரந்தத்தை சேரிக்கும் முறையை கையாள்கிறோம். இதன் மூலம் கிடைக்கும் மகரந்தம் கிலோவுக்கு ரூ.2000 என நல்ல விலைக்கு விற்பனை ஆகிறது. இந்த மகரந்தம் பெண்களுடைய நோய்களுக்கு சிறப்பான மருந்தாக உள்ளது. இதை தினசரி சாப்பிட்டு வந்தால் தலைவலி, மூட்டு வலி, உடல் வலிகள் இருக்காது. உடல் ஆரோக்கியத்துக்கு நல்லது. அதை நாங்ள் சாப்பிட்டு வருகிறோம். தேனை பொறுத்தவரை உள்நாட்டு தேவைக்கே பற்றாக்குறையக உள்ளது. இருந்தாலும் எங்களிடம் தேனை வாங்கி நண்பர் ஒருவர் ஏற்றுமதி செய்கிறார். நல்ல தேன் கிடைப்பது தற்போது அரிதாக உள்ளது. நல்ல தேனாக இருக்கிறதா? இல்லையா என்பதை அறிய ஒரு டம்ளரில் தேனை சிறிது ஊற்றினால் அது கீழே போய் கரையாமல் இருக்க வேண்டும். சர்க்கரை நோயாளிகளுக்கு சிறிது அளவு தேனை கொடுத்தால் ஒன்றும் பாதிப்பு இருக்காது. தேனில் வைட்டமின், மினரல்ஸ், தாதுப்பொருட்கள் உள்ளன. சத்துக்கள்இருப்பதுபற்றி தொடர்ந்து ஆய்வு நடந்து வருகிறது.

Read More

தேனீ வளர்ப்பு

Rock bee coloney in a tree.....

honey combs in a can.....

Rock Bee Coloney

Royal Jelly in a Honey Comb

A Brave Girl

WASP HIVE

Bee Keeping in a village

A Tradational bee box l

Bee Keeping in coir rope hive[Tradational method in rural india]

kvic made isi bee box

Bee Keeping in wooden bark[tradational method]

Sugar feeding for bees in rainy season

A Sucessful beekeeper in rural kerala

Indian bee coloney in a wooden bark

Training for bee keeping

Honey in cans

A LOW COST HONEY FILTER

A Tribal women in her honey out let

Modern Device to test honey

Thnxs:http://ecogreengallery.blogspot.com/

Read More

உங்களுக்காக உழைக்க தேனீக்கள் தயாராக இருக்கின்றது

தேன், ஒரு அதிக ஊட்டச்சத்து நிறைந்த விரும்பத்தக்க உணவாகும். தேனீக்கள், மலர்த்தேனை சேகரித்து, தேனாக மாற்றி, அதை தேன் கூட்டில் சேமிக்கும்.

 தேன் மற்றும் அதை சார்ந்த பொருட்களின் உபயோகம் அதிகரித்து வருவதால், தேனீ வளர்ப்பு ஒரு தொழிலாக முக்கியமடைந்துள்ளது. தேனீக்கள் வளர்ப்பதன் மூலம் வருமானத்தை ஈட்டுவது மட்டுமில்லாமல், மகசூல் உற்பத்தியை அதிகரிக்கலாம். தென்னந்தோப்புகளில், ஆறு அடிக்கு ஒரு பெட்டி வீதம் தேனீ பெட்டிகளை வைத்து வளர்க்கலாம். ஒரு தேனீ பெட்டியில் ஒரு ராணி தேனீ, 20 ஆயிரம் முதல் 30 ஆயிரம் வரை தேனீக்கள் இருக்கும்.தேனீக்கள், இந்திய தேனீ, மலைத்தேனீ, கொம்பு தேனீ, அடுக்கு தேனீ மற்றும் கொசு தேனீ என பல்வேறு வகைகளாக வளர்க்கப்படுகின்றன. ஒரு பெட்டியில், 750 மி.லி., முதல் ஆயிரத்து 250 மி.லி., வரை தேன் சேகரிக்கப்படுகிறது.தேனீ பெட்டிகள் தோட்டக்கலைத்துறையின் மூலமாக அரசு மானியத்துடன் கிடைக்கும். அனைத்து தரப்பு விவசாயிகளும், மகளிர் சுயஉதவிக்குழுவினரும் தேனீ வளர்ப்பில் ஈடுபடலாம். இதன்மூலம் நல்ல லாபம் பெறலாம்.

வேப்ப மரப்பூவிலிருந்து கிடைக்கும் தேன் மருத்துவ குணம் உடையது. வயலில் நெல்லிலிருந்து கிடைக்கும் தேன் உடம்பில் உள்ள கொழுப்பை கரைக்கிறது. ஒவ்வொரு பூக்களிடமிருந்து கிடைக்கும் தேன் ஒவ்வொரு மருத்துவ குணம் உடையதாக இருக்கிறது. நச்சுக் கலக்காத இயற்க்கையாக கிடைக்கும் பொருட்களில் தேனும் ஒன்று. எனவே தேனீ வளர்ப்புக் கலையை நாம் கற்றுக்கொண்டால் மறைமுகமாக இயற்க்கை அன்னையை பாதுகாத்துக்கொள்கிறோம். எனவே துணிந்து தேனி வளர்ப்பு தொழிலைக் கற்றுக்கொண்டு உங்கள் பணத்தை அதில் முதலீடு செய்யுங்கள். உங்களுக்காக உழைக்க தேனீக்கள் தயாராக இருக்கின்றது.

உற்பத்தி முறை

தேனீக்களை வீட்டிலோ அல்லது பண்ணைகளிலோ, பெட்டிகளில் வளர்க்கலாம்.

தேனீ வளர்ப்பதற்கு தேவையான உபகரணங்கள்

கூடு : இது, ஒரு நீளமான சாதாரண பெட்டியாகும். இதன் மேல் வாட்டில், பல அடுக்குகளை கொண்டுள்ளது. தோராயமாக 100 செ.மீ நீளம், 45 செ.மீ அகலம் மற்றும் 25 செ.மீ உயரத்தை உடையது. இந்த பெட்டியின் மொத்தம் 2 செ.மீ ஆகும். தேனீக்கள் உள்ளே நுழைவற்கு 1 செ.மீ அகலமுடைய ஓட்டைகளை கொண்டுள்ளது. மேல் அடுக்குகள் அடர்ந்த தேன் கூட்டை அமைப்பதற்கு தேவையான மொத்தத்தை பெற்று இருக்க வேண்டும். சுமார் 1.5 செ.மீ மொத்தம் இதற்கு போதுமானது. தேனீக்கள் தேன் கூட்டை கட்ட ஏதுவாக, அடுக்குகளுக்கிடையேயான இடைவேளி 3.3 செ.மீ இருத்தல் நல்லது.

புகைப்பான் : இது தேனீ வளர்ப்பில்,  இரண்டாவது முக்கிய உபகரணம் ஆகும். இதை, சிறிய தகரடப்பாவில் இருந்து செய்து கொள்ளலாம். இதனை தேனீக்களை கட்டுபடுத்துவதற்கும் மற்றும் தேனீக்கள் நம்மை கடிக்காமல் இருப்பதற்கும் பயன்படுத்தலாம்.

துணி : நாம் வேலை செய்யும் பொழுது, நம் கண்கள் மற்றும் மூக்குகளை பாதுகாக்க உதவும்.

கத்தி : மேல் அடுக்குகளை தனிப்படுத்துவதற்கும் தேன் கூடுகளை பிரிக்கவும் பயன்படுத்தலாம்.

இறக்கை : தேனீக்களை கூட்டிலிருந்து அப்புறபடுத்துவதற்கு

இராணி தேனீ பிரிப்பான்

தீப்பெட்டி

தேன்கூடுகளை நிறுவும் முறை

·         தேன் வளர்க்கும் இடமானது, நல்ல வடிகால் வசதியையுடைய திறந்த இடங்களாகவும், குறிப்பாக பழத்தோட்டத்திற்கு அருகாமையிலும், மேலும் நிறைய மதுரம், மகரந்தம் மற்றும் நீர் கிடைக்கக்கூடிய இடமாகவும் இருக்க வேண்டும்.

·         சூரிய ஒளியிலிந்து பாதுகாப்பு மிக அவசியமானதாகும். ஏனெனில் அப்பொழுதுதான், மிதமான வெப்பத்தை கொடுக்க இயலும்.

·         தேன் கூட்டிற்குள் எறும்பு ஏறுவதை தடுக்க தேன் கூட்டின் கால்கள் தண்ணீருள்ள சிறு பாத்திரத்தில் நனையுமாறு இருத்தல் வேண்டும்.

·         வெயில் மற்றும் மழையிலிருந்து பாதுகாக்கும் வகையில் தேனீக்களின் காலனிகளை, கிழக்கு திசை நோக்கி அமையுமாறு தேன் கூட்டை அமைக்க வேண்டும்.

·         தேனீக்களின் காலனிகளை, கால்நடைகள், ஏனைய விலங்குகள் , பரபரப்பான வீதிகள் மற்றும் தெரு விளக்குகள் இவைகளிலிருந்து தூரத்தில் அமைக்க வேண்டும்.

தேனீ காலனிகளை அமைக்கும் முறை

·         தேனீ காலனிகளை அமைக்க இயற்கையான கூட்டில் உள்ள தேனீக்களை மாற்றவோ அல்லது வழி செல்லும் தேனீக்களை கவரவோ செய்ய வேண்டும்.

·         இதற்கு முன்பு, பெட்டிகளை பழைய கூட்டின் உதிரிகளை கொண்டோ அல்லது தேனீ மெழுகினைக் கொண்டோ தடவினால் பெட்டியானது தேனீக்களுக்கு பழக்கப்பட்ட வாசனையை உடையதாக அமைக்கப்படும். முடிந்தால், இராணீ  தேனீயை பிடித்து கூட்டினுள் வைத்தால், இது ஏனைய தேனீக்களை கவர்ந்து இழுக்கும்.

·         சில வாரங்களுக்கு பாதி கப் சுடுநீரில் பாதி கப் சர்க்கரையை கலந்து தேனிக்களுக்கு உணவு அளிப்பதன் மூலம் பெட்டியுனுள், வேகமாக கூட்டினை கட்ட இயலும்.

காலனி நிர்வாகம்

·         தேன் அதிகமாக கிடைக்கும் காலங்களில், வாரம் ஓரு முறை அதிகாலை வேளையில், பெட்டிகளை கண்காணிப்பது அவசியம்.

·         பெட்டியினை, கூரை, உற்பத்தி அறை, தளம் என்ற முறையில் சுத்தம் செய்ய வேண்டும்.

·         வலிமையான ராணீ தேனீ, உற்பத்தி மேம்பாடு, தேன் மற்றும் மகரந்த சேகரிப்பு, ராணீ தேனீயின் அறை, தேனீக்களின் வலிமை, மற்றும் ஆண் தேனீயின் வளர்ச்சி ஆகியவற்றை கண்காணிக்க  தேனீக்களின் காலனிகளை தவறாமல் சோதிப்பது அவசியம்.

·         கீழே உள்ள, தேனீயின் எதிரிகளின் தாக்குதல் இருக்கிறதா, என்று சோதிக்க வேண்டும்.

மெழுகு மாத் : பெட்டியிலுள்ள புழு, பட்டு வலைகளை நீக்க வேண்டும்.

மெழுகு வண்டு : வளர்ந்த வண்டுகளை சாகடிக்க வேண்டும்.

மைட் : புதிதாக தயாரித்த பொட்டாசியம் பெர்மாங்கனேட் கரைசலில் நனைக்கப்பட்ட பஞ்சுத் துண்டை கொண்டு, பிரேம் மற்றும் தரைகளை சுத்தம் செய்ய வேண்டும்.

தேன்குறைவாக கிடைக்கும் காலத்தில் நிர்வாகம்.

·         தேன் கூடு அமைக்க தேவைப்படும் அடிப்படை தகட்டை அகற்றி, இளம் வளமான தேனீக்களை உற்பத்தி அறையில் கூட்டாக வைக்கவும்

·         தேவைப்பட்டால் தடுப்பு போர்டுகளை பயன்படுத்தவும்

·         ராணி தேனீ மற்றும் ஆண் தேனீ செல்கள் தென்பட்டால் அழிக்கவும்

·         ஒரு காலனிக்கு, 200 கிராம் என்ற விதத்தில் சர்க்கரை கரைசல் (1:1) இந்திய தேனீக்களுக்கு வாரம் ஒரு முறை அளிக்கவும்

·         எல்லா காலனிகளுக்கும், ஒரே சமயத்தில் அளிப்பதன் மூலம் திருட்டை தவிர்க்கலாம்.

தேன் நிறைய கிடைக்கும் காலங்களில் நிர்வாகம்

·         இக்காலத்திற்கு முன்னரே, காலனிகளை தகுந்த வலிமையுடன் வைத்து இருக்க வேண்டும்

·         தேன் கூடு அமைக்கத் தேவைப்படும் முதல் அடிப்படை தகடு  மற்றும் இளம் தேனீக்கள் இருக்கும் அறைகளிடையே  தகுந்த இடைவெளி அளிக்க வேண்டும்

·         இளம் தேனீக்கள் இருக்கும் அறையிலேயே ராணி தேனீ இருக்குமாறு, தேன் கூடு அமைக்க தேவைப்படும் முதல் அடிப்படை தகடு  மற்றும் இளம் தேனீக்கள் இருக்கும் அறைக்கிடையே இராணி தேனீ பிரிப்பான் தாளை இடவும்

·         காலனி வாரம் ஒரு முறை சோதித்து, தேன் அதிகமுள்ள பிரேம்களை தேன் கூடு அமைக்க தேவைப்படும் அடிப்படை தகட்டின் பக்கவாட்டிற்கு, எடுத்து செல்ல வேண்டும். எந்த ஒரு பிரேமில், 3\4 பாகம் தேன், 1\4 பாகம் மூடப்பட்ட அறைகள், இருக்கிறதோ அதனை உற்பத்தி அறையிலிருந்து வெளியே எடுத்துவிட்டு அந்த இடங்களில் காலியான பிரேம்களை இட வேண்டும்

எந்த ஒரு கூடுகள் முழுவதுமாக மூடப்பட்டு அல்லது 2\3 மூடப்பட்டு இருக்கிறதோ, அவைகளை தேன் எடுப்பதற்கு எடுத்து கொள்ளலாம்

Read More